Page 69 - Demo

TEMA 5Strukturat, mekanizmat, forcat dhe energjiaNë këtë tematikë, nxënësit/et njihen me llojet e strukturave, faktorët që ndikojnë në fortësinë e tyre dhe llojet e materialeve që përdoren në struktura, duke shpjeguar gjithashtu llojet e forcave që veprojnë në materiale. Më tej ata/ato kuptojnë rëndësinë e pajisjeve elektrike dhe elektronike që përdoren në jetën e përditshme dhe ndikimin e tyre në shoqëri; shpjegojnë se çfarë janë makinat e thjeshta si leva dhe sistemet me rrotulla; kuptojnë llojet e makinave të thjeshta dhe janë në gjendje të krijojnë makina të thjeshta vetë nëpërmjet materialeve që gjenden në klasë; paraqesin dhe krahasojnë llojet e mekanizmave transmetues me dhëmbëzorë gjatë punës praktike; përshkruajnë funksionimin dhe rëndësinë e pajisjeve hidraulike dhe pneumatike dhe analizojnë pjesët përbërëse nëpërmjet aktiviteteve praktike. Në fund të kësaj tematike, nxënësit/et dallojnë burimet e energjisë elektrike të ripërtëritshme dhe të paripërtëritshme, si dhe përdorin burimet më të thjeshta të energjisë elektrike gjatë punës praktike; përshkruajnë elementet e ndërtimit të qarkut elektrik të thjeshtë, me çelës etj. duke analizuar punën e çelësave gjatë aktivitetit në shkollë; shpjegojnë punën e motorit, shndërrimin e energjisë elektrike në atë mekanike, si dhe bëjnë dallimin mes rrymës alternative dhe asaj të vazhduar gjatë realizmit të punës praktike në shkollë.