Romani Ne jemi pafundësi i autorit amerikan Stephen Chbosky është romani i tij i parë, botuar më 1999, është romani që rrëfen rritjen e njeriut, kalimin dhe përballimin e fazës së vështirë të adoleshencës, periudhës kur njeriu ndeshet me vështirësitë e para të jetës, kur fillon të formojë karakterin, mënyrat e përballjes me të tjerët dhe veten, shqetësimet e ndryshme të personalitetit që mund të shpien në degradimin shpirtëror dhe moral të të rinjve. Ne jemi pafundësi është historia e Çarlit, një djaloshi 14-15 vjeçar në vitet 90-të, i ndrojtur, introvers, shumë më i zgjuar për moshën që ka, e megjithatë ai mbetet në hije e mënjanohet nga shoqëria. Subjekti dhe historia zhvillohen në formë epistolare, Çarli i shkruan letra një të panjohuri, letra në të cilat i rrëfen për jetën e vet, të familjes dhe shokëve që e rrethojnë. Në përballjet e tij me drogën, me dhunën, me emargjinalizimin, bashkëudhëtare do ti jenë muzika, librat, kinemaja. Kritikët e kanë cilësuar si një libër realist për adoleshentët, dhe një libër nostalgjik për të rriturit. Një nga vlerat e këtij librit qëndron në faktin se shërben thuajse si një udhëzues, si një referencë për shumë titujt të tjerë librash, të këshillueshëm për moshat rinore, titujt këngësh e grupe të ndryshme muzikore, filma me një ndikim të madh në fushën e kinematografisë. Disa vite më vonë, më 2012, vetë autori do të bëhet dhe regjisori i filmit me një të njëjtin titull Ne jemi pafundësi (The perks of being a wallflower) me aktorët e rinj Logan Lerman, Ezra Miller dhe Emma Watson.